Në ambientet e Këshillit të Qarkut Shkodër, u mbajt takimi prezantues i iniciativës “Zëri im, e ardhmja ime”, e cila është realizuar nga SOS Fshatrat e Fëmijëve Shqipëri në bashkëpunim me Këshillin e Qarkut Shkodër. Qëllimi i këtij projekti është ofrimi i shërbimeve logopedike për fëmijët që ndodhen në kushte të rrezikuara socialisht. Në këtë takim morën pjesë përfaqësues të institucioneve vendore, profesionalistë nga fushat sociale dhe arsimore, si dhe aktorë të tjerë të interesuar.
Projekti jo vetëm që parashikon zhvillimin e seancave logopedike, por gjithashtu promovon angazhimin aktiv të prindërve dhe kujdestarëve përmes sesioneve informuese dhe materialeve mbështetëse. Qëllimi është forcimi i rolit të familjes në përmirësimin e zhvillimit komunikativ të fëmijëve.
“Zëri im, e ardhmja ime” shënon një hap të rëndësishëm në krijimin e mundësive të barabarta për çdo fëmijë, duke ndihmuar zhvillimin e potencialit të tyre dhe duke kontribuar në ndërtimin e një ambienti më gjithëpërfshirës dhe mbështetës në Qarkun Shkodër.
