Policia e Lezhës ka intensifikuar kontrollet në zonën turistike të Shëngjinit për të monitoruar zhurmat, si pjesë e masave për sigurimin e rendit dhe qetësisë publike gjatë sezonit veror.
Sipas njoftimeve nga Policia, përveç kontrolleve në terren, janë organizuar takime për ndjeshmërinë e administratorëve të bizneseve dhe individëve që përdorin muzikë, me qëllimin e informimit mbi detyrimet ligjore për respektimin e niveleve të lejuara të zhurmës. Strukturat e Drejtorisë Vendore të Policisë Lezhë, në bashkëpunim me Komisariatin e Policisë, kanë realizuar kontrolle të vazhdueshme në zonat e identifikuara me ndotje akustike. Gjatë këtyre kontrollimeve, janë përdorur matës të specializuar për të verifikuar nivelet e zhurmës në ambiente të hapura dhe të mbyllura, duke u përputhur me legjislacionin për administrimin e zhurmës në mjedis. Sipas të dhënave të marra nga matjet, niveli i zhurmës në subjektet e kontrolluara ka rezultuar brenda kufijve të lejuar nga ligji në fuqi. Njëkohësisht, efektivët e Policisë kanë kontrolluar respektimin e orarit të lejuar për muzikën në ambiente të hapura, i cili, në zonat e banuara, është nga ora 11:00 deri në orën 24:00.
Policia e Lezhës njofton se kontrolllet dhe monitorimi do të vazhdojnë gjatë gjithë sezonit turistik, me qëllim garantimin e qetësisë për banorët dhe pushuesit që vizitojnë bregdetin e Shëngjinit. Po ashtu, qytetarët inkurajohen të denoncojnë çdo rast të shkeljes së rregullave për ndotjen akustike ose cënimin e rendit publik, ndërkohë që Policia garanton një reagim të shpejtë dhe veprim në përputhje me ligjin.
