Damiano Toshi, një nga figura më të njohura të bandës së “5 Dyqaneve”, ka arritur të shmangë dënimin me burgim të përjetshëm dhe mund të lirohet në një të ardhme të afërt, falë vendimit të fundit nga Gjykata e Elbasanit.
Ky trup gjykues shpalli vendimin përfundimtar për Toshin, duke e dënuar atë me 25 vite burg. Ulja e dënimit erdhi pas pranimit të kërkesës për gjykim të shkurtuar, çka rezultoi në rrëzimin e dënimit të mëparshëm me burgim të përjetshëm. Vendimi nga Gjykata e Elbasanit ishte pasojë e rigjykimit të çështjes, të cilin e urdhëroi Gjykata e Lartë. Kjo e fundit më herët kishte anuluar vendimin që e dënonte Toshi me burg të përjetshëm dhe kishte kthyer dosjen për shqyrtim të ri.
Toshi u shpall fajtor për vrasjen e dy basketbollistëve të ekipit “Skënderbeu”, Sokol Jahollari dhe Rafael Rizani, si dhe për plagosjen e Julian Beckës. Ngjarja e rëndë ndodhi më 3 shtator 2004, pranë Pallatit të Sportit në Korçë, dhe konsiderohet si një nga incidentet më të rënda kriminale të asaj kohe.
