Bakllavaja është bërë sërish temë e një polemike mes Greqisë dhe Turqisë, të dyja vendeve që pretendojnë se kjo ëmbëlsirë tradicionale është pjesë e trashëgimisë së tyre kulturore.
Siç raportoi gazeta gjermane Hersfelder Zeitung, Turqia ka dërguar një kërkesë zyrtare në UNESCO për regjistrimin e bakllavasë si pjesë e trashëgimisë së saj kulturore jomateriale. Pritet që vendimi për këtë kërkesë të merret gjatë këtij viti, në mbledhjen e 21-të të Komitetit Ndërqeveritar për Ruajtjen e Trashëgimisë Kulturore Jomateriale, e cila do të mbahet në Xiamen.
Kjo kërkesë nga Ankaraja ka nxitur një reagim të menjëhershëm nga Athina. Autoritetet greke kanë paraqitur argumentet e tyre pranë UNESCO-s, duke theksuar se bakllavaja ka origjinë në traditën kulinare bizantine dhe greke. Nga ana tjetër, Turqia mbështetet në dokumente historike që lidhin këtë ëmbëlsirë me kuzhinën e Perandorisë Osmane në Kostandinopojë.
Njohja nga UNESCO ka një rëndësi të veçantë, pasi përveç vlerës kulturore, ajo ndihmon në promovimin ndërkombëtar, zhvillimin e turizmit dhe forcimin e identitetit kombëtar.
Por debati nuk kufizohet vetëm në dy vendet e Ballkanit. Edhe Siria pretendon se bakllavaja bën pjesë në traditën e saj shekullore, duke përmendur qytetet e Alepos dhe Damaskut, së bashku me përdorimin e fistikëve të njohur të Alepos në recetat e saj tradicionale.
Ndërkohë, studiuesit e historisë gastronomike vlerësojnë se bakllavaja është rezultat i një evolucioni të gjatë kulturor, me ndikime nga traditat bizantine, arabe dhe orientale. Sipas tyre, receta ka evoluar përmes shekujve në territore që dikur ndanin të njëjtën hapësirë kulturore, duke e bërë pothuajse të pamundur përcaktimin e një origjine të vetme.
