Pas përfundimit të njoftimit nga kryetari i bashkisë Lezhë, Pjerin Ndreu, sot Policia Bashkiake dhe administrata kanë kryer një operacion në bregdetin e Shëngjinit, me synimin për të liruar hapësirat publike.
Gjatë këtij kontrolli, u sekuestruan shezllonë dhe çadra që ishin vendosur pa leje në zonat publike të plazhit, si pjesë e masave për të garantuar aksesin e lirë për pushuesit.
Pjerin Ndreu, kryetari i bashkisë Lezhë, ndau gjithashtu pamje nga ky aksion, duke theksuar se kontrolli do të vazhdojë dhe duke paralajmëruar për një politikë zero tolerancë ndaj atyre që shkelin rregullat.
“Në veprim… Lironi hapësirat publike vullnetarisht! Çdo zaptim ose pengim i tyre do të marrë përgjigjen e parashikuar nga ligji. Nuk do të ketë tolerancë për shkeljet,” shkruan Ndreu.
Kjo nismë zhvillohet në kulmin e sezonit turistik dhe ka për synim të sigurojë respektimin e hapësirave publike në plazhin e Shëngjinit, si dhe të parandalojë vendosjen e shezllonëve pa leje.
