Deputetja e pavarur, Marjana Koçeku ka reaguar pas ngjarjeve të sotme gjatë protestës, duke shprehur shqetësim për atë që e cilësoi si dhunë policore ndaj protestuesve.
Përmes një statusi në rrjetet sociale, Koçeku u shpreh se i vjen keq që, sipas saj, “i vetmi komunikim dhe mesazh politik që ky pushtet mund t’u ofrojë protestuesve është dhuna”.
Deputetja theksoi se kur një shteti i mbarojnë argumentet, sipas saj, mbeten vetëm “shkopi i gomës, prangat dhe çizmet e policit”, ndërsa shtoi se historia ka treguar se asnjë pushtet nuk e ka zgjatur jetën duke goditur qytetarët që kërkojnë të dëgjohen.
Në reagimin e saj, Koçeku argumenton se përdorimi i forcës ndaj qytetarëve nuk është shenjë force, por dëshmi e pamundësisë së pushtetit për të bindur qytetarët me argumente.
“Një shtet që zgjedh t’i përgjigjet pakënaqësisë qytetare me dhunë, nuk po demonstron forcë; po demonstron pafuqinë e vet për të bindur”, shkruan deputetja e pavarur.
