Pas një periudhe katër ditore të luftës për jetën në spital, një punëtor shqiptar i moshës 27 vjeçare, i cili u godit nga një shtyllë telekomunikacionesh prej druri në Via Gorghizzolo, në Due Carrare më 26 qershor, ka ndërruar jetë në një spital në Padova më 30 qershor.
I identifikuar si Florian Cani dhe banor i Gemona del Friuli, ai humbi ndjenjat menjëherë pas aksidentit.
Për të, u organizua transporti me ambulancë ajrore dhe u shtrua në një njësit mjekësor intensiv, ku iu ofrua kujdesi mjekësor maksimal. Megjithatë, në fund, mjekët nuk arritën dot të shpëtonin jetën e tij.
Viktima, që ishte nga provinca e Udines, nuk e rifitoi kurrë vetëdijen e tij. Menjëherë pas incidentit, karabinierët nga Kompania Abano dhe specialistët e Spisal mbërritën në vendin e ngjarjes duke kryer të gjitha hetimet e nevojshme.
“Ishte e qartë që gjendja e tij shëndetësore ishte në gjendje të rëndë. Ngjarja e 30 qershorit përbën një tjetër rast tragjik ku një qytetar humb jetën gjatë punës në provincën e Padovës,” theksoi një burim.
“Një skenë e tronditshme që të lë pa fjalë dhe të bën të reflektohesh thellë. Familja e të riut është e shkatërruar, duke pritur deri në fund për një mrekulli që nuk ndodhi,” informon media italiane (foto më poshtë tregon vendin e ngjarjes).
Roberto Toigo, sekretar i përgjithshëm i Uil Veneto, ka deklaruar:
“Rajoni i Venetos është në gjendje zie për një tjetër humbje jete në ambientin e punës: pas katër ditësh në spital, punëtori shqiptar, i cili u godit nga një shtyllë në Due Carrare, ka ndërruar jetë. Sa për keq, lista e viktimave po vazhdon të rritet, në një vit që e ka rikthyer rajonin tonë në fazën kritike për aksidente fatale. Është thelbësore që shëndeti dhe siguria në punë të vihen në qendër të diskutimit publik, duke siguruar një angazhim kolektiv ku secili nga ne merr mbi vete përgjegjësinë për të ndaluar këtë trend tragjik.”
