Është pezulluar nga detyra drejtori rajonal i Autoritetit Kombëtar të Ushqimit në Shkodër, Ramir Haderi. Dokumenti zyrtar i siguruar tregon se urdhri i pezullimit është firmosur më 1 korrik 2026 nga Drejtoria e Shërbimeve të Brendshme pranë AKU-së.
Burime për Northpress.tv bëjnë me dije se në vend të Haderit është komanduar përkohësisht Arsen Heto për drejtimin e institucionit.
Sipas informacioneve, pezullimi vjen pas pretendimeve për shkelje dhe abuzime në ushtrimin e detyrës, si dhe pas debateve që lidhen me largimin e disa inspektorëve të AKU-së. Deri më tani nuk ka një reagim zyrtar nga Haderi lidhur me vendimin.
Ramir Haderi konsiderohet si një nga bashkëpunëtorët e afërt të figurave të rëndësishme të Partisë Socialiste në Shkodër, ndërsa pezullimi i tij vjen në një moment kur në qark po raportohen lëvizje dhe riorganizime në disa institucione shtetërore.
Kujtojmë se vetëm pak ditë më parë Haderi u bë objekt i një sulmi fizik në Shkodër, ku u godit nga persona ende të paidentifikuar. Ai mori ndihmë mjekësore, ndërsa autorët e ngjarjes vijojnë të jenë në kërkim nga policia.
