Një ngjarje skandaloze ka shpërthyer në Policinë e Qytetit të Cyrihut, ku dy policë janë nën hetim për lidhje me një 35-vjeçar shqiptaro-zviceran, i cili është i njohur nga autoritetet për historinë e tij kriminale.
Ky 35-vjeçar paraqitet si një sipërmarrës të suksesshëm në rrjetet sociale, duke treguar një stil jetese luksoz me jahte, makina sportive dhe festa me figura të njohura. Megjithatë, ai është identifikuar si krahu i djathtë i një shpërndarësi të drogës dhe ka pasur disa dënime për vepra penale, përfshirë përdhunime, trafik narkotikësh dhe shkelje të rënda të rregullave të qarkullimit.
Sipas raporteve nga mediat zvicerane, njëra nga policet i kishte ofruar atij akses në sistemin informativ të policisë, duke lënë telefonin e saj të punës të zhbllokuar, gjë që i mundësoi që të kryente kërkime në bazën e të dhënave zyrtare. Për këtë shkelje, ajo mori një urdhër penal në prill dhe humbi punën e saj.
Përveç kësaj, 35-vjeçari krijoi një lidhje edhe me një efektive tjetër të Policisë së Cyrihut. Prokuroria ka hapur një hetim ndaj saj për shkelje të sekretit zyrtar, ndërsa autoritetet theksojnë se deri në një vendim përfundimtar, ajo gëzon prezumimin e pafajësisë. Policia konfirmoi se ajo nuk është më pjesë e trupit policor që prej dhjetorit 2025.
Policia e Qytetit të Cyrihut ka njoftuar se nuk mund të japë më shumë informacion për shkak të mbrojtjes së të dhënave personale. Sipas zyrës për shtyp, që nga viti 2015, institucioni ka krijuar një sektor të veçantë për parandalimin e shkeljeve nga punonjësit, ndërkohë që efektivët trajnohen rregullisht për etikën dhe përgjegjësitë e detyrës. Megjithatë, autoritetet theksojnë se sjellja e punonjësve në jetën e përditshme mbetet jashtë kontrollit të institucionit, pavarësisht se ligji kërkon që ata të mos dëmtojnë imazhin e Policisë as jashtë orarit të punës.
