Protesta e 31-të qytetare, që kërkon dorëheqjen e kryeministrit Edi Rama dhe largimin e qeverisë, ka qenë e shoqëruar me deklarata të fuqishme nga organizatorët. Ata e përshkruan këtë tubim si një fitore tjetër për protestuesit, përballë asaj që ata e konsiderojnë provokime nga policia.
Edison Lika, një nga organizatorët, theksoi se, pavarësisht tensioneve që u krijuan gjatë protestës para Kuvendit, qytetarët arritën të ruajnë karakterin paqësor të protestës dhe nuk u provokuan.
“Sot kemi arritur një tjetër fitore përballë policisë kriminale të Ramës. Kjo protestë, më e bukura në 36 vite, as sot nuk ra pre e provokimeve të policisë. Pavarësisht se tentuan disa herë të na provokonin, ne nuk ramë pre derisa u detyruan të na sulmojnë e më pas ulën kokën. E kuptuan që kjo protestë shënon fundin e tyre. Ju erdhi fundi!”, shprehu ai.
Lika gjithashtu u ndal te zhvillimet në Kuvend, duke vënë në dukje se deputetët e shumicës shmangën përballjen me qytetarët.
“E patë si u fshehën në Kuvend, ndiheshin si minj në çark. Janë të zgjedhurit e krimit dhe oligarkëve, jo tanët,” theksoi ai.
Në përfundim të fjalës, organizatori theksoi se protestuesit dëshmuan edhe një herë angazhimin e tyre për të vazhduar rezistencën paqësore.
“Sot ne rezistuam përsëri paqësisht dhe u treguam se jemi më të drejtë e më të fortë se ata,” përfundoi ai.
