Imami i Zlipotokut, një fshat në Dragash, është vrarë me thikë në një akt të dhunshëm. Ngjarja e rëndë ka ndodhur mbrëmjen e së hënës, kur 47-vjeçari Gazmen Tairovci ka humbur jetën, pasi dyshohet se është goditur me thikë më shumë se pesë herë gjatë një përleshje.
Sipas raportimeve nga policia e Kosovës, në orën 23:15 të datës 29 qershor, autoritetet u informuan për një konflikt ndërmjet disa individëve në fshat.
Pasi mbërritën në vendngjarje, oficerët e policisë e gjetën viktimën të shtrirë në tokë.
Ekipi mjekësor arriti në vendin e ngjarjes dhe konfirmoi vdekjen e imamit.
Beshir Hamza, rreth 40 vjeç, ka dalë si i dyshuar për këtë rast. Ai është një bashkëfshatar i imamit dhe është arrestuar gjatë paradites së sotme, vetëm disa orë pas incidentit.
Hetimet për të zbardhur të plotë ngjarjen kanë filluar, ndërsa dyshimet fillestare fokusohet në një konflikt lidhur me pronën dhe kositjen e barit që i përkiste Hamzës, i cili dyshohet se ishte prekur nga imami, pasi ai ishte paralajmëruar të mos e bënte më këtë veprim.
Këshilli i Bashkësisë Islame ka reaguar ndaj këtij incidenti, duke theksuar se, sipas informacioneve që disponojnë, ngjarja nuk ka të bëjë me aktivitetin apo detyrën e viktimës si imam.
