Në njësinë administrative të Kelmendit është zhvilluar një takim ndërgjegjësues me fokus parandalimin e zjarreve dhe mbrojtjen e pyjeve, në kushtet e temperaturave të larta që kanë përfshirë zonën.
Administratoria e Kelmendit, Florida Peraj, bëri të ditur se në takim morën pjesë kryepleqtë e fshatrave, përfaqësues të Policisë së Shtetit dhe inspektorë të pyjeve për zonën.
Sipas saj, qëllimi kryesor ishte koordinimi i masave parandaluese dhe forcimi i bashkëpunimit mes institucioneve dhe komunitetit lokal për të shmangur çdo rrezik të mundshëm nga zjarret në pyje.
“Bashkëpunimi mes institucioneve, kryepleqve dhe banorëve është çelësi për parandalimin e çdo rreziku, veçanërisht në këto ditë me temperatura të larta”, u theksua gjatë takimit.
Gjithashtu, u është bërë thirrje barinjve që ndodhen në bjeshkë, banorëve dhe vizitorëve të tregojnë kujdes maksimal dhe të shmangin çdo veprim që mund të shkaktojë zjarr.
Në përfundim, autoritetet lokale kanë nënvizuar se mbrojtja e pyjeve dhe pasurive natyrore të Kelmendit është përgjegjësi e përbashkët e të gjithëve.
