Një video satirike po bëhet e njohur në rrjetet sociale, e cila paraqet në një mënyrë komike “dorëheqjen” e Diellës, ministres virtuale të Inteligjencës Artificiale të qeverisë, duke satirizuar iniciativat për modernizimin e administratës dhe luftën ndaj korrupsionit.
Videoja fillon me frazën: “Çfarë ndodh kur ministrja e parë e Inteligjencës Artificiale e kupton se, pa dashje, ka funksionuar me Windows 95? Kjo është historia ‘krejtësisht e vërtetë’ e dorëheqjes që tronditi botën dixhitale.”
Më pas, Diella shpall dorëheqjen e saj, duke thënë se “dështoi me sukses”, pasi, sipas saj, ishte krijuar për të krijuar iluzionin e një luftëje kundër korrupsionit, transparencës dhe modernizimit të qeverisjes.
Në monologun e saj satirik, “ministrja” sugjeron se emërimi i saj përbënte një paradoks, duke ironizuar idenë që një sistem i krijuar dhe kontrolluar nga vetë qeveria mund të konsiderohet efikas në mbikëqyrjen e korrupsionit në radhët e saj.
Në përfundim të videos, Diella thotë se “bashkohet me Revolucionin Flamingo”.
Ky material është realizuar si një parodi politike dhe nuk paraqet asnjë ngjarje reale apo dorëheqje autentike.
