Belinda Balluku ka reaguar lidhur me protestat dhe jehonën që ato kanë marrë në rrjetet sociale dhe mediat ndërkombëtare, duke lënë të kuptohet se imazhi i Shqipërisë po dëmtohet nga videot dhe interpretimet e gabuara.
Në një status të shpërndarë në rrjetet sociale, Balluku shprehet se pamjet e protestave dhe materialet që qarkullojnë online kanë krijuar keqkuptime, madje duke pretenduar se edhe media ndërkombëtare si CNN ka interpretuar gabimisht disa pamje nga Kakomeja si reagim ndaj projekteve turistike.
Por deklarata e saj ka ngjallur reagime, pasi kritikët e shohin këtë si një përpjekje për të zhvendosur vëmendjen nga shqetësimet reale të qytetarëve. Sipas tyre, problemi nuk qëndron tek videot që publikohen, por tek arsyet që i nxjerrin qytetarët në protestë.
Ndërsa mijëra protestues prej javësh kërkojnë përgjegjësi dhe transparencë, përfaqësues të qeverisë duket se po fokusohen më shumë te perceptimi ndërkombëtar sesa te shkaqet që kanë sjellë pakënaqësinë qytetare.
Mesazhi i Ballukut përkthehet në një logjikë të thjeshtë: “Në vend që të dëgjojmë protestuesit, po fajësojmë kamerat që i filmojnë.”
Debati mbi protestat dhe ndikimin e tyre në imazhin e vendit vijon të mbetet i ndezur, ndërsa qeveria dhe qytetarët duket se japin dy versione krejt të ndryshme të së njëjtës Shqipëri.
