Bashkia Malësi e Madhe është tërhequr nga nisma për ndryshimin e emrit të shkollës 9-vjeçare “At Pal Doda” në Bratosh, një propozim që kishte shkaktuar reagime dhe debate në komunitet.
Pas këtij zhvillimi ka reaguar nënkryetari i Bashkisë, Sytki Ndrecaj, i cili në një status publik theksoi se tërheqja nga një vendimmarrje nuk është shenjë frike, por një akt reflektimi dhe përgjegjësie ndaj qytetarëve.
“Tërheqja nuk është kurrë shenjë frike. Përkundrazi, ajo mbart peshë reflektimi dhe përgjegjësie për të ruajtur atë që është më themelore, besimin”, shprehet Ndrecaj.
Ndërkohë, kundër kësaj nisme ishte pozicionuar publikisht edhe Partia Socialdemokrate e Malësisë së Madhe. Përmes një deklarate, PSD bëri të ditur se respekton figurën e intelektualit Gjek Marinaj, por është kundër ndryshimit të emrit të shkollës.
Sipas kësaj force politike, emri i shkollës duhet të mbetet ai i At Pal Dodës, fratit françeskan që, sipas deklaratës, u spiunua nga shërbimet serbo-sllave dhe u dënua me vdekje nga regjimi komunist si “prift reaksionar”.
Tërheqja e Bashkisë vjen pas reagimeve të shumta publike dhe kundërshtive të shprehura ndaj propozimit për ndryshimin e emrit të institucionit arsimor.
