Gazetarja Klodiana Lala ka reaguar ndaj deklaratave të kryetares së Kuvendit, Elisa Spiropali, duke i bërë thirrje që të marrë përgjegjësi për periudhën kur ka qenë pjesë e qeverisjes socialiste.
Përmes një statusi publik, Lala i drejtohet Spiropalit me tone të drejtpërdrejta, duke i kërkuar që, nëse është serioze në qëndrimet e saj, fillimisht të kërkojë falje për atë që ka ndodhur gjatë 13 viteve të qeverisjes ku ka qenë pjesë.
“Nëse je serioze në çfarë shkruan, kërko falje për çka ka ndodhur në 13 vjet ku ishe pjesë e qeverisjes dhe dil në shesh”, shkruan gazetarja.
Më tej, Lala ngre edhe pyetjen nëse deklaratat e kryeministrit ndaj qytetarëve përbëjnë një arsye të fortë për protestë, duke i bërë thirrje Spiropalit të distancohet nga, siç i cilëson ajo, “zullumet” e qeverisjes.
Reagimi vjen në kulmin e debatit politik dhe protestave të ditëve të fundit, ndërsa thirrja e gazetares përmban një mesazh të qartë: që figura të rëndësishme të mazhorancës të mbajnë qëndrim publik ndaj kritikave që po adresohen ndaj qeverisë dhe kryeministrit.
