SPAK ka realizuar deri më tani kontrolle mbi 17 biznese dhe më shumë se 30 kompani të ndryshme që veprojnë në sektorin e ndërtimit.
Dokumentet e siguruara nga weblajm.com tregojnë se kontrollet kanë përfshirë kompaninë Lura shpk, e njohur për ndërtimin e vilave në Lalëz, të njohura si Lura 1, 2 etj.
Po ashtu, ndër kontrollet është përfshirë edhe administratori i kësaj kompanie, Dodë Doçi.
SPAK ka marrë autorizimin e gjykatës për të zhvilluar kontroll dhe sekuestro në subjektet që janë duke u hetuar.
Arsyeja e kontrolleve ndaj Lura dhe zotit Doçi mbetet e paqartë. Megjithatë, emri i tij figuron në dosjen hetimore që ka të bëjë me Salvador dhe Isa Aliu, të dyshuar për trafikim të 50 tonëve kokainë dhe pastrim parash në miliona euro.
Pjesë nga Dosja
Objektet e sekuestruara gjatë kontrollit përfshinë aparate telefonike, pajisje kompjuterike (kompjutera/laptop), USB, disa pajisje të tjera memorizuese, hard disk, blloqe dhe fletë shënimesh, kontrata shitjesh, kontrata bashkëpunimi, fatura likuidimi, si dhe dokumente që mund të jenë në dispozicion të kompanive të ndërtimit në lidhje me bashkëpunimin e tyre me shoqëritë tregtare/kompani ndërtimi, pronë e shtetasve Isa Aliu, Nikoll Bibaj dhe Shpetim Bibaj, si dhe telefonat celularë të administratorëve dhe kontabilistëve të këtyre shoqërive, si dhe çdo send tjetër që lidhet me këto vepra penale, që do të sekuestrohen.
