Kryetari i bashkisë Lezhë, Pjerin Ndreu, ka reaguar në lidhje me ngjarjen e rëndë në plazhin e Tales, ku dy vajza të mitura humbën jetën.
Me një mesazh ngushëllimi, ai shprehu trishtimin e tij të thellë për këtë humbje të paimagjinueshme, duke theksuar se ashtu si fjalët, as ngushëllimet nuk janë të mjaftueshme përballë kësaj tragjedie. Ai u shpreh me sinqeritet të plotë për familjet dhe të afërmit e viktimave.
Kryebashkiaku gjithashtu ngriti shqetësimin mbi mungesën e kujdesit dhe vigjilencës në plazhet që nuk administrohen, të cilat siç tha ai, nuk mbikëqyren as nga sektori privat dhe as nga bashkia e Lezhës. Ndreu theksoi se në këto ambiente, është thelbësore që prindërit të jenë të vetëdijshëm për fëmijët e tyre dhe të kushtojnë vëmendje të veçantë ndaj atyre që nuk dinë të notojnë.
Ai theksoi gjithashtu se plazhet e menaxhuara ofrojnë sinjalistikën e nevojshme, zona të identifikuara për vizitorët, si dhe infrastrukturën e duhur për sigurinë e tyre, duke apeluar për një rritje të ndërgjegjësimit dhe bashkëpunimit nga të gjithë qytetarët.
