Irani ka shpallur një grup të ri rregullash për anijet që dëshirojnë të kalojnë përmes Ngushticës së Hormuzit, një nga korridoret më të rëndësishme për tregtinë globale të naftës.
Autoriteti i ri i Ngushticës së Gjirit Persik (PGSA) njoftoi se të gjitha anijet tregtare janë të detyruara të regjistrohen paraprakisht dhe të sigurojnë leje e sigurim përpara se të lejohet kalimi në këtë rrugë ujore strategjike.
“Të gjitha anijet duhet të regjistrohen dhe të pajisen me leje për të siguruar një kalim të sigurt në Ngushticën e Hormuzit”, deklaroi Autoriteti i Ngushticës së Gjirit Persik.
Sipas informacioneve nga autoritetet iraniane, regjistrimi dhe sigurimi do të ofrohen falas gjatë një periudhe 60-ditore, e cila është e mbuluar nga një memorandumi mirëkuptimi të nënshkruar së fundmi mes Iranit dhe Shteteve të Bashkuara. Megjithatë, Teherani ka paralajmëruar se pas përfundimit të kësaj periudhe, mund të aplikohen tarifa për shërbimet e sigurisë, mbrojtjes dhe sigurimit.
“Gjatë kësaj periudhe 60-ditore, tarifat për sigurinë, mbrojtjen dhe shërbimet ambientale, si dhe sigurimet iraniane të nevojshme, nuk do të kërkohen nga pronarët e anijeve dhe do të mbulohen nga qeveria e Republikës Islamike të Iranit”, saktëson deklarata e PGSA-së.
Kjo njoftim erdhi disa ditë pas deklaratës së presidentit amerikan Donald Trump, i cili tha se kalimi nëpër ngushticë do të ishte pa pagesë për 60 ditët e para.
Për më tepër, autoritetet iraniane theksuan se anijet duhet të ndjekin një itinerar të caktuar me kujdes gjatë kalimit nëpër ngushticë, për të shmangur zonat e minuara.
“Mosrespektimi i këtij rregulli do të jetë përgjegjësi e pronarit të anijes”, theksoi PGSA.
Këto rregulla të reja hyjnë në fuqi në një periudhë kur trafiku detar në Ngushticën e Hormuzit ka filluar të rikuperohet pas muajsh pasigurie dhe kufizimesh për shkak të frikës nga sulme të mundshme iraniane.
Sipas kompanisë së inteligjencës detare AXSMarine, të enjten kaluan 25 anije tregtare nëpër ngushticë, duke shënuar numrin më të lartë të regjistruar që nga prilli.
