Mbledhja e Komisionit të Ligjeve ishte e karakterizuar nga tensione dhe përplasje mes Saimir Korreshit, deputet i Partisë Demokratike, dhe Zegjine Çaushi, deputete e Partisë Socialiste, duke e devijuar debatin për disa minuta nga çështjet e rendit të ditës.
Konflikti i fjalëve filloi kur Çaushi komentoi mandatin e Korreshit me tonin: “Mezi fitoi me të shtytur.” Kjo e nxiti deputetin demokrat të reagonte, duke e vendosur në pikëpyetje mënyrën e hyrjes së deputetes socialiste në Kuvend.
Debati vazhdoi me nuanca ironike, me të dy deputetët që shkëmbyen komente mbi zonat që përfaqësojnë dhe legjitimitetin e mandateve të tyre parlamentare.
Pjesë nga debati:
Korreshi: “Unë nuk fola për Roskovecin, për ato çështje në Lushnjë që i di, kam të drejtë. Kur të vij në Roskovec, atëherë ti…”
Çaushi: “Hajde kur të duash.”
Korreshi: “Po më bëre ftesë…”
Çaushi: “Po patjetër, hajde.”
Në këtë pikë, ndërhyri ministri i Drejtësisë, Ulsi Manja, duke kërkuar që diskutimi të rikthehej në çështjet që po shqyrtonte komisioni.
Manja: “Zoti Korreshi, mbaruat me pyetjet? Vazhdoni me pyetjet.”
Korreshi: “A do më lësh në Lushnjë apo do më çosh në Roskovec?”
Manja: “Rri në Lushnjë më mirë.”
Pas kësaj, Korreshi iu drejtua deputetes socialiste me akuza në lidhje me legjitimitetin e mandatit të saj.
Korreshi – Çaushit mbi mandatin e deputetit: “Ti nuk fitove me merita. I tha Bela asaj: ‘Hiqe këtë’. Nuk e more ti. Ajo dha dorëheqjen një nga Lushnja për t’i hapur rrugë Gazit. Kujdes me mua! Ajo dha dorëheqjen sepse i thanë: ‘Alo! Shpejt se do hyjë shoqja Zegjine’. Ta dinë shqiptarët. Ti fitove hiç e hiç, por s’fitova unë.”
Pas ndërhyrjes nga kryesuesit e mbledhjes, diskutimet u rikthyen në rendin e parashikuar të punimeve të Komisionit të Ligjeve.
