Kadastra e Shkodrës ka përfunduar pajisjen me dokumente pronësie të 67 objekteve fetare në qark, duke i dhënë fund një procesi të rëndësishëm për formalizimin e pasurive të komuniteteve fetare.
Bëhet fjalë për kisha, xhami dhe ambiente ndihmëse, të cilat tashmë disponojnë certifikata pronësie, duke fituar siguri juridike dhe një status të qartë ligjor.
Sipas institucionit, ky proces shkon përtej aspektit administrativ, pasi lidhet drejtpërdrejt me mbrojtjen e trashëgimisë historike, kulturore dhe shpirtërore të zonës. Dokumentimi i pronësisë krijon garanci për ruajtjen e objekteve të kultit dhe vlerave që ato përfaqësojnë për besimtarët dhe komunitetin.
Pajisja me certifikata pronësie konsiderohet një hap i rëndësishëm për administrimin e rregullt të këtyre pasurive dhe për mbështetjen e bashkëjetesës e harmonisë fetare që karakterizon Shkodrën dhe zonat përreth.
