Afro 40 për qind e shqiptarëve kanë vështirësi për të mbajtur shtëpinë ngrohtë, duke e renditur Shqipërinë mes vendeve me nivelin më të lartë të “varfërisë energjetike” në rajon, krahas Kosovës.
Sipas të dhënave, Shqipëria dhe Kosova kanë përqindjen më të madhe të familjeve që nuk janë në gjendje të ngrohin strehën, si pasojë e kostove të larta të energjisë dhe të ardhurave të pamjaftueshme.
Organizata për Bashkëpunim dhe Zhvillim Ekonomik (OECD) raporton se rreth 40 për qind e familjeve në Kosovë dhe 38 për qind në Shqipëri nuk arrijnë të sigurojnë ngrohjen e banesës, duke shënuar kuotat më të larta në Evropë për këtë tregues.
Shtetet e tjera të rajonit shfaqin nivele më të ulëta të këtij fenomeni, ndërkohë që mesatarja evropiane është vetëm 10.6 për qind.
Në Maqedoninë e Veriut, norma është 23 për qind, në Mal të Zi 14 për qind, ndërsa në Serbi vetëm 9.5 për qind. Ky problem njihet edhe si “varfëri energjetike”.
Përkundër uljes së çmimit të energjisë elektrike një vit më parë, raporti evidenton se 27 për qind e popullsisë shqiptare vazhdon të hasë vështirësi për të paguar shërbimet utilitare.
Si përgjigje ndaj kësaj situate, qeveria shqiptare ka miratuar Strategjinë e Mbrojtjes Sociale deri në vitin 2030, e cila synon të luftojë varfërinë energjetike përmes forcimit të skemave financiare dhe promovimit të përdorimit të paneleve diellore, veçanërisht në zonat rurale.
