Në kuadër të 115-vjetorit të lindjes së shkrimtarit të njohur Migjeni, Biblioteka Publike “Marin Barleti”, me mbështetjen e Bashkisë Shkodër, organizoi një performancë artistike të mbështetur në prozën e një prej figurave më të rëndësishme të letërsisë shqipe.
Performanca, e konceptuar dhe interpretuar nga Astrit Fani, solli një këndvështrim intim dhe personal mbi veprën e Migjenit, duke ndërthurur fjalën, interpretimin dhe muzikën për të përcjellë emocionet dhe mesazhet që karakterizojnë krijimtarinë e shkrimtarit.
Pjesë e këtij aktiviteti ishin edhe instrumentistët Jetmir Mesi dhe Erion Lishi, ndërsa moderimin e drejtoi Arjola Zadrima. Një kontribut të veçantë dha edhe profesor Xhahid Bushati, i cili foli mbi rëndësinë dhe aktualitetin e veprës së Migjenit në letërsinë shqipe.
Përmes kësaj performance, publiku pati mundësinë ta përjetonte krijimtarinë migjeniane përtej leximit tradicional, duke u njohur me një interpretim artistik bashkëkohor që rikthen në vëmendje temat e dhimbjes njerëzore, shpresës dhe ndërgjegjes shoqërore.
Në 115-vjetorin e lindjes së tij, Migjeni vijon të mbetet një nga zërat më të fuqishëm të letërsisë shqipe, me vepra që ruajnë aktualitetin dhe vazhdojnë të nxisin reflektim edhe sot.
