Situata në Drizë të Fierit vijon të mbetet problematike, ndërsa flakët janë përhapur me shpejtësi të madhe të favorizuara nga era, duke iu afruar zonave të banuara dhe duke shkaktuar panik te banorët.
Banorët e zonës për mediat tregojnë momentet e frikës kur panë zjarrin të përhapej pranë banesave të tyre.
“Si ky zjarr nuk ka rënë asnjëherë më parë. U frikësuam shumë, ishte zjarr i madh”, u shpreh një banor.
Një tjetër banore rrëfeu se zjarri i gjeti të papërgatitur, ndërsa ndodheshin në shtëpi.
“Ne jemi trembur, s’dimë çfarë të bëjmë, po i afrohet banesave. Ishim në shtëpi, po hanim bukë kur dolëm dhe pamë zjarrin”, tha ajo.
Ndërkohë, forcat zjarrfikëse dhe strukturat e Emergjencave Civile vijojnë ndërhyrjen në terren për të vënë flakët nën kontroll dhe për të shmangur rrezikun për banesat dhe banorët e zonës.
