KF Vllaznia ka zyrtarizuar afrimin e radhës në merkato, duke prezantuar mesfushorin Randy Dwumfour si futbollistin më të ri të skuadrës kuqeblu.
Klubi shkodran bën me dije se lojtari ka firmosur një kontratë 1+1, me të drejtë rinovimi, dhe do të jetë pjesë e projektit të Vllaznisë për sezonet e ardhshme.
Dwumfour vjen pas eksperiencës së tij në kampionatin shqiptar dhe pritet të forcojë repartin e mesfushës falë forcës fizike, dinamizmit dhe përvojës së fituar në Superiore.
Në njoftimin e publikuar nga klubi, Vllaznia i ka uruar mirëseardhjen futbollistit, duke shprehur besimin se ai do të japë një kontribut të rëndësishëm në arritjen e objektivave të ekipit.
“Mirë se erdhe në familjen kuqeblu!”, shkruan klubi shkodran në prezantimin e mesfushorit të ri.
