KF Vllaznia ka reaguar pas dorëheqjes së Lazër Matijës nga drejtimi i Shoqatës Rajonale të Futbollit Shkodër dhe Klubit të Futbollit të Femrave Vllaznia, duke e cilësuar si një “kambanë alarmi” për të ardhmen e futbollit të femrave.
Në një deklaratë publike, klubi vlerëson kontributin 13-vjeçar të Matijës, nën drejtimin e të cilit Vllaznia e Femrave fitoi titujt kampionë dhe u përfaqësua në arenën europiane, përfshirë përballjet në UEFA Women’s Champions League ndaj skuadrave si Real Madrid, PSG dhe Chelsea.
Vllaznia i kërkon FSHF-së dhe Bashkisë Shkodër ndërhyrje urgjente për të garantuar vazhdimësinë e ekipit, ndërsa apelon edhe për mbështetjen e biznesit dhe institucioneve të tjera.
“Vllaznia e Femrave nuk duhet të lihet të rrezikojë të pushojë së ekzistuari”, thekson klubi, duke e mbyllur deklaratën me mesazhin: “Lazër Matija ndërtoi një histori. Detyra jonë është që ajo histori të vazhdojë.”
