Vllaznia në futbollin e femrave po vazhdon përgatitjet intensive në prag të pjesëmarrjes në Ligën e Kampionëve. Në kuadër të kësaj faze përgatitore, kampionet e Shqipërisë zhvilluan një ndeshje miqësore në stadiumin “Loro Boriçi”, ku u përballën me ekipin e Apolonisë.
Sfida përfundoi me fitoren 3-2 të skuadrës fierake, një test që i dha mundësi stafit teknik të analizojë formën e ekipit dhe të evidentojë elementët që kërkojnë më shumë punë përpara nisjes së kompeticionit europian.
Pas përfundimit të takimit, trajneri Nikolin Leka u shpreh i pakënaqur me paraqitjen e skuadrës, duke theksuar se lojtaret duhet të rrisin ritmin, përqendrimin dhe nivelin e lojës për të qenë sa më të përgatitura për sfidat e Ligës së Kampionëve.
Në ditët në vijim, stafi teknik do të vijojë punën për të përmirësuar mangësitë e shfaqura në këtë ndeshje kontrolli, me objektivin që Vllaznia të paraqitet sa më dinjitozisht dhe konkurruese në arenën europiane.
