Skuadra e basketbollit e Vllaznisë për meshkuj ka nisur me këmbë të mbarë sezonin e ri në Superligë, duke fituar bindshëm kundër Elbasanit me shifrat 97-80 në takimin e zhvilluar në Shkodër. Nën drejtimin e trajnerit Eni Llazani, kuqeblutë u treguan dominues dhe arritën të marrin një fitore të vlefshme që në javën hapëse të kampionatit.
Edhe pse Elbasani kishte rritur ndjeshëm nivelin e skuadrës me praninë e katër basketbollistëve amerikanë, vendasit e nisën fort takimin. Perioda e parë u mbyll me epërsi të lehtë për Vllazninë, 33-28, ndërsa gjatë çerekut të dytë u pa një rritje e qartë në lojë: shkodranët shkuan në pushim me avantazh të thellë 59-39.
Superioriteti i kuqebluve nuk u zbeh as në pjesën e tretë të ndeshjes, të cilën e fituan 20-16, duke e çuar rezultatin total në 79-55. Në dhjetë minutat e fundit, trajneri Llazani përfshiu më shumë lojtarë të rinj në parket, ndërsa Elbasani shkurtoi disi diferencën, pa mundur të rrezikojë suksesin e Vllaznisë.
Pas përfundimit të ndeshjes, trajneri Eni Llazani ndau komentet e tij për skuadrën, duke veçuar mes të tjerëve edhe lojtarin e ri Sead Kopliku, të cilit i dha besim me minuta të rëndësishme në fushë.
Triumfi 97-80 ndaj Elbasanit e vendos Vllazninë në pozita të mira në start të sezonit, ndërsa objektivi i skuadrës është që të garojë fort për të qenë mes më të mirave të basketbollit shqiptar. Në javën e dytë të Superligës, kuqeblutë do të zbresin në transfertë përballë Pogradecit, të dielën më 18 tetor.
