Universiteti i Shkodrës “Luigj Gurakuqi” dhe Shoqata Kombëtare e Guidave Turistike të Shqipërisë (NATGA) kanë nënshkruar një marrëveshje bashkëpunimi, që synon forcimin e lidhjeve mes arsimit të lartë dhe sektorit profesional të turizmit.
Marrëveshja u nënshkrua nga rektorja e UNISHK-së, Prof. Dr. Blerta Dragusha, dhe drejtorja ekzekutive e NATGA-s, Ardiola Alikaj. Bashkëpunimi parashikon krijimin e mundësive të reja për studentët përmes praktikave profesionale, vizitave studimore, aktiviteteve në terren, leksioneve të hapura dhe trajnimeve me ekspertë të turizmit.
Në fokus do të jenë zhvillimi i aftësive profesionale, interpretimi i trashëgimisë kulturore dhe natyrore, hartimi i itinerareve turistike, kërkimi shkencor dhe promovimi i turizmit të përgjegjshëm e të qëndrueshëm.
Vëmendje e veçantë do t’i kushtohet programit profesional “Udhërrëfyes turistik dhe menaxhues i itinerareve turistike për rajonin verior”, që zhvillohet pranë Departamentit të Gjeografisë në Universitetin e Shkodrës. Përmes këtij bashkëpunimi synohet që studentët të ndërthurin njohuritë teorike me përvojën praktike dhe të përgatiten më mirë për kërkesat e tregut të punës.
Marrëveshja synon gjithashtu të krijojë më shumë mundësi për zhvillimin e karrierës së studentëve dhe të forcojë bashkëpunimin ndërmjet institucionit akademik dhe profesionistëve të turizmit, në një sektor me rëndësi për zhvillimin ekonomik të rajonit.
