Pasi u shfaqën shqetësime gjatë ditës për ndotjen e ujërave në Gjirin e Lalzit, Shoqëria Rajonale Ujësjellës Kanalizime Durrës ka dhënë një reagim, duke hedhur poshtë mundësinë që ngjyra e errët e ujit të jetë pasojë e shkarkimeve të ujërave të zeza.
Sipas SHRUKD, kontrollet në terren kanë treguar se hidrovori i Hamallajt, i cili ndodhet rreth një kilometër larg bregut të detit, ka qenë jashtë funksionit dhe nuk ka patur shkarkime të ujërave drejt detit në këtë periudhë.
SHRUKD sqaron se errësimi i ujit është rezultat i baltës, llumrave dhe sedimentimeve që janë depozituar në kanal, të cilat janë lëvizur si pasojë e qarkullimit të ujit, ndikimit të baticave e zbatica, si dhe nga moti me erë dhe dallgë të forta ditët e fundit.
Në njoftimin e saj theksohet gjithashtu se gjatë inspektimeve nuk është konstatuar prania e ujërave të zeza në zonën e përmendur. Për më tepër, SHRUKD deklaron se rezidencat në këtë zonë janë të lidhura me rrjetin e kanalizimeve, duke bërë të mundur që ujërat e ndotura të dërgohen në Impiantin e Trajtimit të Ujërave të Ndotura në Lalëz.
Shoqëria thekson se impianti operon vazhdimisht, 24 orë në ditë, dhe se monitorimi i situatës do të vazhdojë.
