Pas një periudhe kërkimesh që zgjati 48 orë, është gjetur trupi i pajetë i 37-vjeçarit Armando Zajsi, i cili tragjikisht u mbyt në ujërat e liqenit të Ulzës gjatë pasdites së së hënës.
Trupi i tij u identifikua nga një dron nënujore të Forcave Detare, i cili arriti në vendin e ngjarjes këtë të mërkurë. Kërkimet u kryen nga palumbarët e forcës RENEA, së bashku me ndihmën e forcave të armatosura dhe shërbimeve të tjera të mbrojtjes civile nga Bashkia Mat.
Pasi pajisja dron identifikoi trupin në një thellësi prej 37 metrash, palumbarët e RENEA-s u zhytën dhe arritën të nxjerrin trupin e pajetë të 37-vjeçarit në sipërfaqe.
Trupi më pas u transportua për ekspertizë mjekoligjore, pas së cilës do t’i dorëzohet familjes për t’i bërë lamtumirën e fundit. Armando Zajsi, i cili kishte shkuar në Ulëz me kushurinj dhe shokë për të darkuar në një nga restorantet e zonës, pritej të rikthehej në Itali të Martën, ku jetonte e punonte prej disa vitesh.
Këtu, ai kishte marrë një jetski dhe kishte hyrë në ujërat e liqenit për të bërë disa xhiro. Gjatë një momenti, ai ra nga mjeti dhe, ndonëse tentoi t’i afrohej me not, dyshohet se ka humbur ndjenjat dhe është zhytur në thellësi.
