Njësia Speciale Delta, në koordinim me Komisariatin e Policisë Kufitare Sarandë, ndërhyri për të asistuar dy turistë ukrainas, të cilët ishin në rrezik për shkak të përkeqësimit të kushteve atmosferike gjatë qëndrimit të tyre në det.
Gjatë një patrullimi në zonën e Ksamilit, forcat e policisë vërejtën një skaf, të cilin turistët e kishin marrë me qira, duke u fundosur për shkak të erërave të fuqishme dhe klimës së ashpër. Në skaf ndodheshin dy shtetas ukrainas.
Menjëherë, efektivët e Njësisë Speciale Delta morën masa për të shpëtuar turistët, të cilët, për fat të mirë, rezultuan në gjendje të mirë shëndetësore pas shpëtimit.
Punimet për nxjerrjen e mjetit lundrues në breg po vazhdojnë aktualisht.
Policia Kufitare është e përkushtuar në mënyrë të vazhdueshme për të garantuar sigurinë e jetës së qytetarëve dhe turistëve në zonat detare të Shqipërisë.
