Terminali i autobusëve vijon të mbetet një nga premtimet ende të parealizuara në qytet nga kryebashkiaku Benet Beci, ndërsa situata në terren po bëhet gjithnjë e më problematike.
Në mungesë të një terminali të dedikuar, autobusët dhe mjetet e transportit ndërqytetas vijojnë të parkojnë në zonën qendrore të qytetit, duke shkaktuar kaos të vazhdueshëm në qarkullim. Qytetarët dhe drejtuesit e mjeteve raportojnë trafik të rënduar, bllokime dhe vështirësi në lëvizje, sidomos në oraret e pikut.
Banorët shprehen se situata është kthyer në një problem të përditshëm, ndërsa qendra e qytetit po përballon një ngarkesë që nuk është e përshtatshme për këtë lloj transporti. Sipas tyre, mungesa e një terminali funksional jo vetëm rëndon trafikun, por ndikon edhe në sigurinë rrugore dhe cilësinë e jetesës në zonë.
Ndërkohë, premtimi për ndërtimin dhe funksionalizimin e terminalit të autobusëve mbetet ende i pazbatuar, duke e lënë këtë çështje në qendër të debatit publik në qytet.
