Policia e Sarandës ka arrestuar një person të shpallur në kërkim që nga fillimi i këtij muaji, i akuzuar për përpjekje rrëmbimi ndaj një vajze nga Nepali pranë doganës së Qafë Botës. Aksioni policor u zhvillua në mesditë, në lagjen nr.4 pranë stadiumit të Sarandës, dhe rezultoi në ndalimin e Mariglen Kondit, 30 vjeç, banues në Tepelenë, i njohur për precedentë të shumtë penalë.
Ngjarja në fjalë u shënua në orën 18:53 të datës 2 korrik, në segmentin rrugor Konispol-Qafë Botë, në një zonë të njohur si “Postbllok”. Sipas hetimeve, Kondi u përpoq disa herë ta fuste me forcë në makinë të renë nepaleze, por ajo arriti të largohej me vrap dhe njoftoi policinë. Identifikimi i 30-vjeçarit Mariglen Kondi nga Salaria e Tepelenës u mundësua nga pamjet e kamerave të sigurisë. Ai kishte precedentë të shumtë penalë; në vitin 2020 u arrestua për “kultivim bimësh narkotike” në bashkëpunim dhe u la në “Arrest në shtëpi”. Ndërkohë që ishte nën këtë masë sigurie, ai e theu atë dhe më vonë, në vitin 2021, u prangos sërish për vjedhjen e disa kamioncinave në Lushnjë.
