Zyrtarët e Bashkimit Evropian pritet të miratojnë të mërkurën rreth 1,650 emërtime të reja në kuadër të sanksioneve të unionit ndaj Rusisë, duke e kthyer këtë paketë në zgjerimin më të madh të listës që nga fillimi i agresionit të plotë rus në Ukrainë në vitin 2022. Sipas burimeve, pjesa më e madhe e emërtimeve do të synojë sektorin ushtarako-industrial të Rusisë.
Paketa e re është hartuar nga Shërbimi i Veprimit të Jashtëm të BE-së (EEAS) dhe pritet të marrë miratimin fillestar nga ambasadorët. Pas kësaj, listat do t’u përcillen ministrave të jashtëm të shteteve anëtare të BE-së të hënën e ardhshme për ratifikim përfundimtar.
Rreth 1,570 nga emërtimet e reja janë të ndërlidhura me individë dhe entitete nga kompleksi ushtarako-industrial rus, ku mbi gjysma janë fokusuar në prodhuesit e raketave.
Numri aktual i emërtimeve në listën kryesore të sanksioneve të BE-së kundër Rusisë është pak më shumë se 3,000. Këto përfshijnë ndalime për udhëtim, ndalimin e transaksioneve financiare brenda territorit të BE-së, si dhe ngrirje të aseteve.
Një pjesë e emërtimeve të reja përfshin gjithashtu referenca ndaj Rusisë, por ato përfshihen në korniza të ndryshme sanksionesh, përfshirë edhe disa që lidhen me kufizimet që BE ka vendosur ndaj Koresë së Veriut.
Pakoja e mëparshme e masave të koordinuara të BE-së, e 21-ta me radhë, u miratua në korrik.
