Në qytetin Noáin të veriut të Spanjës, të paktën 50 persona u plagosën pasi fishekzjarrët shpërthyen papritur mes turmës gjatë fillimit të festimeve dedikuar Shën Michaelit, shenjtorit mbrojtës të qytetit.
Ngjarja u regjistrua rreth mesditës në komunitetin e Navarrës, pranë Pamplonës. Sipas të dhënave nga autoritetet, një fishekzjarr ishte lëshuar nga ballkoni i bashkisë si pjesë e ceremonisë së hapjes së festimeve.
Megjithatë, pasi u lëshua fishekzjarri i parë, shkëndijat e tij dyshohet se ndezën fishekzjarre të tjerë, të cilët shpërthyen dhe u drejtuan drejt grumbullit të qytetarëve të pranishëm në shesh.
Tre burra 41, 53 dhe 54 vjeç u transportuan në spital për trajtim mjekësor pasi pësuan djegie si pasojë e incidentit.
Ndërkaq, 47 persona të tjerë morën ndihmë të parë në qendrën lokale shëndetësore, kryesisht prej djegieve të lehta dhe dhimbjeve të veshëve të shkaktuara nga shpërthimi.
Pamjet e transmetuara nga televizioni spanjoll kapin momentet e kaosit. Në to, pjesëmarrësit, të veshur me të bardha dhe shamitë karakteristike të kuqe, shihen duke u larguar me nxitim nga sheshi, ndërkohë që fishekzjarrët shpërthejnë në mesin e tyre.
Autoritetet kanë nisur një hetim për të sqaruar se si ndodhi incidenti dhe për të përcaktuar mënyrën se si fishekzjarrët arritën të shpërthenin pranë qytetarëve.
