Ministrja e Shëndetësisë dhe Mbrojtjes Sociale, Klodiana Spahiu, ka zhvilluar një takim me të rinjtë që jetojnë në Shtëpinë Familje për grupmoshën 16–18 vjeç në Shkodër.
Përmes një postimi në rrjetet sociale, Spahiu ka ndarë momente nga takimi, ku në fokus ishin talentet, energjia dhe aspiratat e të rinjve për të ardhmen.
Ministrja theksoi se mbështetja ndaj tyre nuk duhet të përfundojë me mbushjen e moshës 18 vjeç. Sipas saj, synohet që të rinjtë që largohen nga sistemi i përkujdesjes sociale të kenë mundësi konkrete për të ndërtuar një jetë të pavarur.
Kjo mbështetje parashikon orientim dhe formim profesional, zhvillimin e aftësive për punësim dhe krijimin e mundësive për integrimin e tyre në tregun
e punës.
