Deputeti i PD-së Bardh Spahia ka reaguar pas fjalimit të sotëm të Edi Ramës që prezantoi platformat e reja të propagandës së tij.
Spahia shkruan se, platformat e Ramës nga ‘Shqipëria që Duam’ te ‘Pasqyra Albania’ dhe ‘Besa’, janë nisma të reja, por hajdutë të vjetër.
Reagimi i deputetit Bardh Spahia:
Mund të ndryshojnë emrat e portaleve dhe dizajnin e faqeve sa të duan, por nuk e fshehin dot faktin e pamohueshëm. Thirrja kryesore dhe e vetme e çdo shqiptari, që nga sheshet e në çdo portal apo rrjet social sot është: Rama jepe doreheqjen! Shqipërinë e duan, qeverinë hajdute jo. Shqiptarët e dinë mirë që nuk ka më të pabesë se hajduti.
Qytetarët e shumtë të ndershëm të këtij vendi nuk vuajnë se u mungon një aplikacion në celular, por sepse përballen përditë me një shtet të kapur nga hajdutëria, ku paratë publike avullojnë në tendera e afera dhe shërbimet bazë mungojnë. Këto fasada digjitale janë thjesht makijazh për të fshehur kalbëzimin e një sistemi të tërë.
Zgjidhja nuk vjen nga butonat e një qeverie që ka humbur çdo legjitimitet moral, apo nga satelite imagjinarë 1 dhe 2, por nga largimi i menjëhershëm i kësaj bande kriminale që e ka kthyer vendin në pronë private.
Mjaft më me manovra dhe mashtrime të ricikluara. Jeni dhe do mbeteni përherë hajdutë të kapur në vjedhje nga çdo shqiptar tashmë.
