Numërimi mbrapsht po përfundon. Kupa e Botës 2026 nis sonte, duke hapur kështu festën më të madhe të futbollit. Në një periudhë prej 39 ditësh, 48 tërësi kombëtare do të garojnë për trofeun më të lakmuar në sport, në një turne që do të ketë më shumë ekipe dhe më shumë ndeshje se kurrë më parë, duke qenë premtuese për spektakël të jashtëzakonshëm.
Këtu mund të gjeni informacione të rëndësishme për favoritët, lojtarët kryesorë, formatin e ri të garës, oraret, biletat dhe të gjitha zhvillimet e tjera që e shoqërojnë këtë kompeticion para ndeshjes hapëse.
Kupa e Botës 2026, e cila do të zhvillohet në Shtetet e Bashkuara, Meksikë dhe Kanada, shënon herën e parë që tri vende bashkëorganizojnë këtë kampionat, që mbahet çdo katër vjet.
Kjo edicion do të jetë më i madh në histori në lidhje me numrin e pjesëmarrësve.
Ndeshja e parë e këtij turneu do të zhvillohet mes Meksikës dhe Afrikës së Jugut në Meksiko Siti, të enjten, pra sonte në orën 21:00, sipas kohës lokale në Kosovë. Finalja është caktuar për tu luajtur më 19 korrik në Nju Xhersi, SHBA.
Kush merr pjesë?
Kjo Kupë e Botës është e para që përfshin 48 vende, duke ndryshuar kështu nga edicionet e mëparshme që kishin 32. Kombet e njohura si Argjentina, Brazili, Franca, Gjermania, Spanja dhe Anglia do të jenë mes ekipeve që do të garojnë për këtë trofe të madh.
Për fat të keq, fituesja e katërfishtë e Kupës, Italia, nuk është e pranishme, duke dështuar të kualifikohet, njësoj si Kosova dhe Shqipëria – të dyja afër, por të dështuara në fazën përfundimtare, e duke humbur mundësinë për të debutuar në një Botëror.
Si zhvillohet gara?
Kombëtaret që marrin pjesë këtë vit janë të ndara në 12 grupe me nga katër ekipe secili. Dy skuadrat me më shumë pikë (fitore 3, barazim 1) do të avancojnë direkt në fazën tjetër, e njohur si 32 më të mirët.
Pjesa tjetër e kësaj faze do të përfshijë ekipet që renditen të tretat në grup, por që janë me rezultatet më të mira. Gjashtëmbëdhjetë ekipe do të eliminohen në grupet përkatëse.
Gjatë ndeshjeve në grup, nuk do të ketë gjuajtje penalltish për të përcaktuar fituesin. Mirëpo, në fazat e mëvonshme, nëse ndeshjet përfundojnë baraz, do të luhen 30 minuta shtesë dhe nëse rezultatet mbeten të paqarta, atëherë do të zhvillohen penalltitë.
Në çfarë oraresh luhen ndeshjet?
Tifozët në Kosovë dhe në Evropë duhet të përgatiten për netë të gjata, ose për t’u zgjuar herët në mëngjes, sidomos gjatë dy javëve të para të turneut. Ndeshjet e Kupës së Botës fillojnë pas mesnatës për tifozët europianë, duke nisur nga ora 1 e mëngjesit e tutje.
Pjesa tjetër e ndeshjeve nis në orën 4 të mëngjesit, sipas kohës lokale në Kosovë, si dhe në orare më të arsyeshme, si 18:00 dhe 21:00. Plot 35 ndeshje në fazën e grupeve do të fillojnë mes mesnatës e deri në orën 6 të mëngjesit, sipas orarit të Kosovës.
Disa nga ndeshjet e fazës eliminatore gjithashtu do të jenë në orar të papërshtatshëm, por tifozi evropian do të ndjehet më mirë kur të mësojë se gjysmëfinalet dhe finalja do të zhvillohen në orën 21:00, sipas kohës lokale në shumicën e vendeve europiane.
Kush janë favoritët?
Dy kombëtarët që konsiderohen si favoritë kryesorë janë kampionia e dyfishtë, Franca, dhe Spanja, që e ka fituar këtë kampionat një herë. Franca disponon një skuadër të mbushur me yje, si Kylian Mbappe, Ousmane Dembélé dhe Michael Oliseh. Ndërsa Spanja mbështetet te talente të rinj si Lamine Yamal, i moshës 18 vjeçare.
Po ashtu, kampionia mbrojtëse dhe fituesja e trefishtë, Argjentina, bashkë me Brazilin, ekipin më të suksesshëm në historinë e Kupës së Botës, kanë mundësi reale për sukses. Brazilin do të synojë të fitojë trofeun e gjashtë, i pari që nga viti 2002.
Biletat e ndeshjeve
FIFA, organi qeverisës i futbollit botëror, është përballur me kritika të ashpra për politikën e saj të çmimeve të biletave për këtë Kupë Bote. Kur biletat u lanë në shitje në janar, çmimet varionin nga rreth 122 euro deri në rreth 7,570 euro. Edhe pse disa bileta më vonë u ofruan me çmime më të ulëta, të tjerat përjetuan një rritje të ndjeshme çmimi – deri në rreth 28,740 euro për finalen.
Çmimet në tregun dytësor janë edhe më të larta. Në prill, platforma zyrtare e FIFA-s për rishitjen e biletave kishte katër bileta për finalen me çmim rreth 2.3 milion dollarë secila. Edhe pse FIFA nuk i kontrollon çmimet në këtë platformë, ajo merr një komision prej 30 për qind nga çdo transaksion.
Tensionet ndërkombëtare
Pak muaj më parë, FIFA konfirmoi se skuadra e Iranit kishte zhvendosur kampin e saj nga Arizona në Meksikë, si rezultat i bombardimeve të nisura në shkurt nga SHBA dhe Izraeli. Edhe pse një armëpushim hyri në fuqi në fillim të prillit, janë raportuar sulme të ndërsjella në intervale të rastësishme.
Në ditët e fundit, është raportuar se futbollistët iranianë do të lejoheshin të hynin në SHBA vetëm ditën e ndeshjeve të tyre, por kjo informacion u hodh poshtë nga SHBA. “Këto komunikata janë të pavërteta. Falë zemërgjerësisë së presidentit Donald Trump, ekipi iranian do të arrijë një ditë para ndeshjeve”, tha një zëdhënës i Departamentit të Sigurisë Kombëtare të SHBA.
Megjithatë, disa anëtarëve të ekipit iranian nuk iu dhanë viza, përfshirë “anëtarë kyç të stafit drejtues dhe administrativ”, sipas Federatës së Futbollit të Iranit. Midis tyre: menaxheri i ekipit, dy analistë, drejtori i mediave dhe një përfaqësues i Ministrisë së Punëve të Jashtme, sipas Ambasadës iraniane në Meksikë.
Po ashtu, gjyqtari somalez Omar Artan iu ndalua hyrja në SHBA për shkak të “lidhjeve të tij me persona të dyshuar si anëtarë të organizatave terroriste”, sipas zyrtarëve amerikanë. Artan, i shpallur gjyqtari më i mirë i Afrikës në vitin 2025, pritej të bëhej somalezi i parë që do të gjykonte në fazën finale të një Kupe Bote, por iu mohua hyrja në Aeroportin Ndërkombëtar të Majamit, pavarësisht se kishte pasaportë diplomatike dhe vizë amerikane.
Somalia është një nga 12 vendet që janë përfshirë në listën e ndalimit të udhëtimit, të vendosur nga presidenti Trump.
Nga REL
