Vendimi i deputetes së Shkodrës, Marjana Koçeku, për të vijuar mandatin si deputete e pavarur ka sjellë reagime edhe brenda radhëve socialiste.
Anëtari i Këshillit Bashkiak të Tiranës, Alfred Muharremi, tha se e respekton zgjedhjen e Koçekut, por vuri në dukje se shqetësimet dhe kauzat që ajo ngre sot nuk janë të reja dhe kanë ekzistuar edhe gjatë kohës kur ishte pjesë e Partisë Socialiste.
Përmes një reagimi në rrjetet sociale, Muharremi theksoi se një deputet që nuk përfaqëson më forcën politike me të cilën është zgjedhur duhet të heqë dorë nga mandati. Sipas tij, mandati nuk është një pronë personale, por një përgjegjësi e marrë nga votuesit dhe partia që e ka kandiduar.
Deklarata vjen në një ditë pasi Koçeku njoftoi largimin nga grupi parlamentar i Partisë Socialiste, duke zgjedhur të vazhdojë rrugëtimin e saj politik si deputete e pavarur.
