Vështirësitë e vazhdueshme financiare mund të kenë pasoja të ndjeshme në shëndetin e trurit. Një kërkim i fundit tregon se stresi i zgjatur që lidhet me çështjet ekonomike shoqërohet me përkeqësim të kujtesës dhe plakje më të shpejtë të trurit.
Rezultatet e studimit tregojnë se individët që kanë përjetuar vështirësi ekonomike për periudha të gjata gjatë jetës, në moshën 53-vjeçare shfaqin funksione njohëse më të dobëta sesa ata që nuk janë përballur me probleme të vazhdueshme financiare.
Kërkimi, i cili mbuloi një grup prej 2 mijë e 759 pjesëmarrësish në Mbretërinë e Bashkuar, vërtetoi se pasiguritë afatgjata ekonomike janë të lidhura me përkeqësim të kujtesës dhe ndryshime në tru që përkojnë me plakje të përshpejtuar.
Hulumtuesit nga Kolegji Universitar i Londrës vlerësojnë se ndikimin më të madh nuk e kanë periudhat e shkurtra të vështirësive financiare, por stresi ekonomik që grumbullohet ndër vite.
Sipas ekspertëve, tensioni i përhershëm për gjendjen financiare rrit presionin mendor, duke bërë që truri të ketë më pak mundësi për procese të tilla si përqendrimi apo marrja e vendimeve.
Po ashtu, studimi nxori në pah se efektet e stresit ekonomik në plakjen e trurit vihen re më tepër te meshkujt, te ata që kanë përballuar vështirësi që në fëmijëri, si dhe te individët me predispozitë gjenetike për sëmundjen e Alzheimerit.
Studiuesit nënvizojnë se lehtësimi i varfërisë kronike dhe ndihma për individët në kushte të vështira ekonomike mund të ketë ndikim pozitiv jo vetëm tek mirëqenia shoqërore, por edhe në parandalimin e rënies njohëse dhe të rasteve të demencës në të ardhmen.
