Nata hapëse e “Dua Fest” u mbush me energji, muzikë dhe atmosferë të gjallë, duke u zhvilluar në sfondin e Kalasë së Rozafës, pranë brigjeve të Drinit dhe Bunës. Artistë të njohur të muzikës shqiptare, përfshirë Lyrical Son, MC Kresha, Kida, Sardi Strugaj dhe David Dreshaj, performuan disa nga hitet e tyre, duke sjellë ritëm e argëtim për publikun e mbledhur.
Megjithatë, mbrëmja nuk iu dedikua vetëm muzikës dhe festës. Në këtë edicion, “Dua Fest” vendosi gjithashtu theksin te mesazhet ndërgjegjësuese, duke i kushtuar vëmendje të veçantë kujdesit, mbrojtjes dhe dashurisë ndaj kafshëve endacake.
Kjo është hera e dytë radhazi që “Dua Fest” organizohet në Shkodër, duke bashkuar tingujt muzikorë me tematika sociale. Festa do të vazhdojë edhe në natën tjetër, kur pritet që në skenë të ngjiten emra të tjerë të njohur të muzikës shqiptare.
