Sekretari i Përgjithshëm i Organizatës së Kombeve të Bashkuara, António Guterres, ngriti sot alarmin për “pasoja katastrofike” për stabilitetin global, në kontekstin e intensifikimit të tensioneve mes Shteteve të Bashkuara dhe Iranit. Ai bëri thirrje për një “rikthim urgjent në negociata” nga të dy palët.
Siç u shpreh zëdhënësi i tij, Stéphane Dujarric, Guterres është “thellësisht i shqetësuar” për rritjen e tensioneve në Gjirin Persik, duke vlerësuar se situata aktuale mund të dëmtojë përparimin diplomatik të arritur midis Teheranit dhe Uashingtonit.
“Nëse armiqësitë rikthehen në shkallë të plotë, pasojat do të jenë katastrofike, për popujt e rajonit, për paqen dhe sigurinë ndërkombëtare, si dhe për ekonominë globale”, theksohet në deklaratën e lexuar nga Dujarric.
Guterres bëri thirrje për Shtetet e Bashkuara dhe Iranin që të ulen sërish për bisedime dhe të zgjidhin çështjet e mbetura përmes diplomacisë, siç theksohet në deklaratë.
