Nga Paulin Marku
1. Në Shqipëri, pushteti nuk ka gjithmonë nevojë të blejë njerëzit, por mjafton t’u japë shpresën e një karrigeje.
2. Disa nuk ndryshojnë bindje politike,por ndryshojnë vetëm anën ku ndodhet pushteti.
3. Servilizmi fillon aty ku mbaron karakteri,kur parimi zëvendësohet me interesin personal.
4. Duartrokasin sot atë që e shanin dje, jo sepse kanë ndryshuar mendim, por sepse ka ndryshuar interesi.
5. Në një shoqëri normale, pushteti kontrollohet, por në një shoqëri të sëmurë, pushteti duartrokitet.
6. Karrigia është bërë për disa më e rëndësishme se dinjiteti,sepse
posti është më i shtrenjtë se fjala e dhënë.
7. Më e rrezikshme se korrupsioni i parave është korrupsioni i ndërgjegjes, pasi paratë mbarojnë , ndersa servilizmi mbetet.
8. Partitë politike kanë nevojë për njerëz me shtyllë kurrizore, jo për turma që tundin kokën,sepse demokracia nuk ndërtohet me “po, shef”.
9. Interesi ekonomik mund të shpjegojë një kompromis, por nuk e bën atë të ndershëm,pasi dinjiteti nuk duhet të ketë çmim.
10. Shqipëria do të ndryshojë atëherë kur qytetari të mos pyesë çfarë fitoj unë, por çfarë i shërben vendit dhe deri atëherë, servilizmi do të vazhdojë të jetë hija e çdo pushteti.
Një shoqëri që i frikësohet pushtetit nuk është e lirë dhe nuk është ende gati për demokraci.
