Policia ka shpëtur 15 familje nga fshati Riban në Mallakastër, duke evakuuar gjithashtu bagëtitë dhe kafshët shtëpiake për shkak të rrezikut të krijuar nga përhapja e flakëve në këtë zonë. Kontrolli dhe angazhimi i forcave të rendit po vijon në të gjithë territorin që është prekur nga zjarri.
Meqë zjarri po i afrohej zonave të banuara, forcat e Policisë reaguan menjëherë, duke evakuuar të gjithë banorët e prekur dhe kafshët e tyre, për të garantuar sigurinë e jetës dhe të pasurisë së tyre.
Shërbimet e Policisë, së bashku me trupat zjarrfikëse, Forcat Kombëtare të Sigurisë dhe struktura të tjera përgjegjëse, janë ende të pranishme në terren. Ato po mbështeten edhe nga ajri, ku një helikopter i Ministrisë së Mbrojtjes dhe një avion Canadair ndihmojnë për të izoluar dhe shuar vatrat e zjarrit, si edhe për t’u ardhur në ndihmë banorëve të zonës.
Paralelisht, nën drejtimin e Prokurorisë, grupi hetimor po vijon punën për të përcaktuar origjinën e zjarrit, për të dokumentuar të gjitha rrethanat dhe për të identifikuar përgjegjësit, në rast se flakët janë shkaktuar si rezultat i veprimeve të paligjshme.
