Kryeministri Edi Rama ka vlerësuar nisjen e punimeve për aksin Milot–Balldren si një projekt me rëndësi të veçantë për zhvillimin ekonomik dhe turistik të veriut të vendit.
Në një reagim publik, Rama thekson se kjo rrugë do të ndikojë drejtpërdrejt në përmirësimin e lëvizjes së qytetarëve, rritjen e sigurisë rrugore dhe krijimin e mundësive të reja për biznesin dhe turizmin në rajon.
Sipas kryeministrit, projekti pritet t’i japë një impuls të ri zhvillimit të Shkodër, Lezhë dhe gjithë veriut të Shqipërisë, duke përmirësuar ndjeshëm lidhjet infrastrukturore mes zonave kryesore.
“Për Shkodrën, Lezhën dhe gjithë veriun, nisja e punës për aksin Milot–Balldren është një hap shumë i rëndësishëm për zhvillimin e zonës. Ky projekt do të lehtësojë lëvizjen, do të rrisë sigurinë rrugore dhe do t’i japë një shtysë të re turizmit, biznesit dhe ekonomisë në Shkodër, Lezhë dhe gjithë veriun e vendit”, shprehet Rama.
