Qytetarja Vilma Jahja ka ngritur shqetësimin për gjendjen e zonës në rrugën drejt derdhjes së Bunës, duke kërkuar heqjen e barakave dhe ndërhyrje minimale për ta bërë zonën më të aksesueshme për vizitorët.
Përmes një reagimi publik, ajo shprehet se kjo pjesë e bregdetit duhet të ruajë natyralitetin e saj dhe të shfrytëzohet më mirë për turizëm, duke propozuar krijimin e shtigjeve për ecje dhe, në të ardhmen, edhe një rrugë natyrore për biçikleta.
“Ecjen prej Plazhit të Adës deri te derdhja e Bunës do ta fusja edhe në guidat turistike. Asht një mrekulli që s’e shfrytëzojmë sa duhet”, shkruan Jahja.
Ajo kërkon që të hiqen barakat përgjatë kësaj rruge, të pastrohen pemët e rrëzuara në det dhe t’u krijohen vizitorëve më shumë mundësi për të shijuar natyrën pa u detyruar të kalojnë nëpër pengesa.
Sipas saj, turizmi kërkon zgjedhje dhe ndërhyrje të menduara mirë, pa dëmtuar peizazhin natyror, ndërsa nënvizon se zona e derdhjes së Bunës ka potencial të kthehet në një nga shëtitjet më të bukura turistike në Shqipëri.
Burimi: Portali Veriu Sot
