Bashkia Shkodër ka informuar publikun dhe vizitorët e qytetit për vendosjen e një ndalese të përkohshme të lëvizjes së automjeteve drejt Kalasë së Rozafës, si pasojë e punimeve që po realizohen në kuadër të projektit për rritjen e potencialit të turizmit kulturor në këtë monument të trashëgimisë historike.
Në njoftimin e Bashkisë, thuhet se Rruga e Qafës do të jetë e mbyllur përkohësisht për mjetet deri në kryqëzimin me Rrugën “6 Maji”.
Në këtë periudhë, të gjithë drejtuesit që udhëtojnë drejt Kalasë së Rozafës duhet të ndjekin devijimin e parashikuar dhe të përdorin si rrugë alternative Rrugën “6 Maji”, sipas skemës së trafikut të përcaktuar për këtë zonë.
Kjo masë është marrë për të mundësuar zhvillimin e punimeve për ndërtimin e parkimit dhe të Qendrës së Vizitorëve, e cila do të ketë gjithashtu funksionin e një pike informacioni për turistët që vizitojnë këtë kala.
Bashkia Shkodër ka apeluar ndaj drejtuesve të automjeteve të respektojnë sinjalistikën e përkohshme rrugore dhe të tregojnë kujdes gjatë lëvizjes pranë zonës ku po kryhen ndërhyrjet.
Kufizimi në qarkullim do të mbetet në fuqi deri në përfundimin e punimeve përkatëse, ndërsa nga qytetarët dhe vizitorët kërkohet mirëkuptim gjatë kohës që do të zgjasin këto ndërhyrje.
