Kryetari i Partisë Socialiste në Poliçan, Erjon Zylyftari, ka njoftuar dorëheqjen nga kjo forcë politike gjatë protestës së zhvilluar mbrëmjen e sotme kundër Reformës Territoriale.
Në të njëjtën protestë, qytetarët e Poliçanit kanë kundërshtuar çdo ndryshim që, sipas tyre, rrezikon të heqë bashkinë e tyre nga harta administrative.
Me pankarta në duar, banorët janë mbledhur në sheshin përpara kinemasë së qytetit, duke kërkuar që qeveria të mos prekë statusin e Bashkisë së Poliçanit.
“Poliçani nuk preket”, “Mos na vrisni të ardhmen”, “Harram i paçi votat e Poliçanit”, “Deputetë dele, mos e votoni reformën”, ishin disa nga mesazhet e shkruara në pankartat e protestuesve.
Banorët deklaruan se Poliçani duhet të vijojë të jetë bashki më vete, duke theksuar se çdo ndryshim i statusit të saj do të ndikojë në zhvillimin e qytetit dhe të ardhmen e brezave të rinj.
Gjatë tubimit, disa qytetarë dogjën edhe teserat e Partisë Socialiste në shenjë revolte ndaj politikave të ndjekura nga qeveria.
Në fund të protestës, banorët firmosën një peticion ku kërkojnë që Bashkia e Poliçanit të mos preket nga Reforma Territoriale.
