Asociacioni i Gazetarëve të Shqipërisë ka shprehur shqetësimin lidhur me incidentin e ndodhur gjatë protestës së Partisë Demokratike, ku gjatë përplasjeve mes protestuesve dhe Policisë së Shtetit është goditur ekipi i medias së Syri TV.
Sipas reagimit të AGSH-së, mjeti i Policisë me ujë me presion ka goditur drejtpërdrejt kamerën, operatorin Armando Varfi dhe gazetaren Marsi Cerma. Kjo e fundit raportohet se është goditur edhe në fytyrë dhe për disa minuta është ndjerë keq.
Asociacioni rikujton se gazetarët dhe operatorët në terren janë duke kryer detyrën e tyre për informimin e publikut dhe nuk duhet të bëhen objekt i ndërhyrjeve apo veprimeve që rrezikojnë sigurinë fizike gjatë raportimit.
Në deklaratë, AGSH u bën thirrje autoriteteve policore që gjatë menaxhimit të protestave dhe tubimeve të garantojnë respektimin e standardeve për sigurinë e gazetarëve dhe të tregojnë kujdes maksimal për të shmangur incidente që cenojnë punën e medias në terren.
